मृगजळ वनवास आणि तृष्णा

मृगजळ वनवास आणि तृष्णा

विजेचे कवच संध्येचे कुंडल
बाळ तान्हा पाण्यावरी

आकाशी वाळवंट जमीनी मृगजळ
चांदण्यात कोटीसूर्य तरंगती

उदय अस्त आसावले चक्र
धगधगतो सूर्य अंतरी वेदनेच्या

----------------------------------------
सांडला पारिजात वाढला अश्वत्थ
संन्यासपण जागे अंगणात

भोग वनवास त्याग वनवास
तांदळाचे धुण वाळले दुधावरी

खोप नशिबी वैराग्य भरते         
विव्हळतो आत्मा चिरंजीव
---------------------------------

बोबडे बोल उसवितो हुंदके  
हळहळतो पान्हा देवकीचा

व्याकुळ तृष्णा करुण बासरी
यमुनेचा काठ भिजत नाही

कल्लोळ प्रेमात सरती आसवे  
दयाघन रमतो एकएकटे 
-------------------------------


------कविता

कर्ण अश्वथामा आणि कृष्ण यांच्या बालपणात काहीतरी विलक्षण साम्य वाटते मला ते काही असे