इंद्रधनुष्य
घेवूनी फिरंगी तलवार आले पहा सात मावळे
हर एकाचा रंग ढंग न्यारा रचती ढगांचे सापळे
चालून मागून पुढती झालेत कसे रक्तबंबाळ
सांभाळ रे क्षितिजा तुझा लाडकासा सूर्यबाळ
लावूनी प्रत्यंचा नभाची ओढतात निळा चाप
रापलेल्या उन्हाचा ते सातजण भोगतात शाप
दग्ध होई लाल जरासा नारंगी होई जरतारी
दोन वेडे शूर तपस्वी आहेत मौनस्थ शिकारी
हिरवे पिवळे बाप लेक दोघे विरुद्ध करती चाल
पिवळा म्हणे तिरकस उंट हिरवा घेई घोडा भाल
निळा म्हणे एकटा मी राजा अंबराचा मी रंग
युद्धनीती विश्वाची जाणतो एकटा तो श्रीरंग
पारवे जांभळे एकाच घराचे आहेत दोन भेदी
एक जन्माचा नजरबंदी दुसरा मरणास कैदी
करुनी म्यान तलवार सागरी थेंब अज्ञातवासी
पहा इंद्रधनू हे सप्तरंगी दिसते कसे श्रावणमासी
----कविता
No comments:
Post a Comment