नेणीव

नेणीव 


ती गायची तिच्या बोलीभाषेतील गाणी 
अर्थ उमजायचा नाही कोणालाही 
तिच्या गाण्यावर होता त्याचा प्रभाव
तो बहुचर्चित फरारी असणारा कैदी 

तिच्या प्रासादिक रचनांचा आशय
उमजला सैनिकी गणवेशांतील मनांना
तिच्या घरात आले शस्त्रधारी
तिला नव्हता माहीत त्याचा पत्ता
ती निव्वळ साकारतसे अभिव्यक्ती

कल्पनांची रोपटे आली होती दारात
तिच्या वेणीचे झाले होते त्याने सर्प
म्हणुन तळमळीने गातसे ती गाणे
कुठलीच दुःख वेदना नव्हती मनात

तिला ना परिचित त्याच्या नजरेचा दंश
ना संवेद त्याच्या वासनांचे नाचरे मोर
त्याच्या पाठीवरचा ना वेचला होता वारा
त्याच्या छातीवर ना टेकले होते कपाळ

कधी एकदाच गेली होती त्याच्या दारा
खेळायला आणले होते सागरगोटे
दगडाचे बीज झाले तिच्या स्पर्शाने
आले वात्सल्य तिच्या ह्रुदयामध्ये
तिने सांभाळली रोपटी नाकळतेपणे

दिला तिने सैनिकांना त्याचा पत्ता
उडी मारली दारामागच्या विहरीत
कुणी सांगितलेली त्याची मरण वार्ता
खोटीच वाटायची इतके दिवस तिला

------कविता