संकल्प
घराच्या खिडक्या दारे
बंद करुन
कडेकोट भिँती बांधेन
संपुर्ण घराला
आणि
छताला नवा दरवाजा
बसवावा म्हणते
आले जर कोणी शत्रु
चाल वैगरे करुन
तर दरवाज्यातुन उडी टाकुन
आकाशमार्गाने
जाणारा रस्ता शोधता येईल
त्यावेळी
आता रस्त्याने चालणेच नको
काचा इजा
दुखापती मलम
सांत्वन
पुन्हा तेच पाय घट्ट जमिनीत
कितीदा फिरणार
तीच ती ऋतुचक्र
आणि तरीही स्वागत नववर्षाचे
कुठेतरी भेदलेच पाहिजे वर्तुळ
किँवा पुर्ण केली पाहिजे अर्धवर्तुळाची प्रदक्षिणा
आता भिती भुकंपाची नाही
जगबुडीची नाही
माझ्या वेदनेच्या
साधनेचे वारुळ
उभा राहिल
माझ्याभोवती
पोखरतील मुंग्या माझे शरीर
दंश करतील सर्प
त्यांच्या विष मुखांनी
मी गाडले गेलेच तर
इतिहासाच्या उत्खननात
येईल माझे निःशेष झालेले नाव
पण
कुठेतरी असेलच एखादे
असे अंतराळ
जिथे असेल सांकव
आकाश आणि मला जोडणारा
म्हणुनच
छताला बांधेन दरवाजे
हाच संकल्प
नववर्षाच्या स्मरणांचा
-----कविता
No comments:
Post a Comment