लिहायची केली घाई
वाचायचं होत खूप काही
अर्ध्या ओल्या डोळ्यावरच
कोऱ्या कोऱ्या काळजावरच
निसटून गेली हातातून शाई
आता वाटते लिहायची केली घाई
वाचायचं होत खूप काही
आभाळभरल्या कागदावरल
मेघावरच्या रेघांमधल
पाण्याच्या तरंगावर विरून गेली शाई
आता वाटते लिहायची केली घाई
वाचायचं होत खूप काही
मातीवरल्या रेघोट्यामधल
रेघोट्यावरल्या नावामधल
ओठावर झाली अनोळखी सही
आता वाटते लिहायची केली घाई
वाचायचं होत खूप काही
बोथट बोथट शब्दामधल
धारेदार धार अक्षरामधल
लिहिण्याआधीच आटून गेली शाई
आता वाटते लिहायची केली घाई
वाचायचं होत खूप काही
रिकाम्या सोडलेल्या समासामधल
कोपऱ्यात मुडदलेल्या कागदावरल
पण नव्हता कागद नव्हती शाई
आता वाटते लिहायची केली घाई
----कविता
No comments:
Post a Comment