तळ्याकाठी एक झोपडी

तळ्याकाठी एक झोपडी



तळ्याकाठी एक झोपडी
पिँजुन बैसे तिचे केस
मावळतीच्या सुर्य ढगावर
म्हातारीचा कापुस वेश

टेकविता गगनाने माथा
दिसते एक झाड वाकडे
म्हातारी ओरडुन सांगे
सरणाची ओली लाकडे

वाहते तळ्यात मौनगंगा
विस्कटते ना तरंग घडी
सुरकुतलेला देह अखंड
म्हातारी पोचते पैलथडी

वारयाने उडतो पाचोळा
परतती पाखरांचे थवे
म्हातारी अनाथ एकटी
तिला दुपार उन्ह सोसवे

ओल्या तांबुस वाळुमध्ये
शिँपला चांदण्याचा सडा
भुकेजल्या पोटांस तिच्या
दिसतो अर्धा भाकरतुकडा

दगडावर टाके उघडे अंग
वाळत पडे नदीचा घाट
म्हातारीला आले शैशव
शोधे अंधार नागवी वाट

आंबाच्या झाडावर रात्री
लटकली जातसे कोल्हेकुई
दबल्या पायी मांजर हुंदके
तिला जोजवे तिचीच अंगाई

शोधु लागली माकडे घरे
चालु लागले पहाड तिकडे
म्हातारीच्या हातात काठी
हुसकुन लावे सुर्यांचे कोँबडे

उसवते क्षितीजाची वीण
मोकळा होई आभाळ वारा
सोडुनी हळु कमरेची चंची
म्हातारी कोंबतसे तोबरा

आकाश जमवे एकेक फांदी
वरी तो सुर्याचा तप्त गोळा
म्हातारीच्या चुली सरपण
काट्याकुटे वाळळेला पाचोळा

कसा सरेल दिवस आजचा
विचारात राघु मैना जोडी
शिकारयाने ऐकली कुजबुज
म्हातारीचा एक डोळा फोडी

घायाळ वेडी म्हातारी शापली
पिसेल तुला आठवणींचे भुत
वेदना दुःख काही न उमजे
पिँजारशील तू तुझेच सुत

मरुन गेली म्हातारी तेथेच
सुटला भुतकाळाचा तिढा
वर्तमान हेच भविष्य आता
शिकारा झाला वेडा बावडा

----कविता